ᐊᓐᓇᐅᒪᔭᕆᐅᕐᓴᓂᕐᒥᒃ ᐃᓕᓐᓂᐊᕐᓂᖅ

 ᓄᕕᐱᕆ 8, 2017 (ᐃᖃᓗᐃᑦ, ᓄᓇᕗᑦ) –ᐃᖃᓗᓐᓂ ᐱᒋᐊᖅᑎᑦᓯᔩᑦ ᒪᕐᕈᐊᑎᕐᓗᑎᒃ ᐊᓐᓇᐅᒪᔭᕆᐅᕐᓴᑎᑦᑎᓂᕐᒥᒃ ᐃᓕᓐᓂᐊᑎᑦᑎᓛᕐᖓᑕ ᓄᕕᐱᕆᒥ. ᐃᓕᓐᓂᐊᓂᕐᒥ ᐊᑐᖅᑕᐅᓛᖅᑐᑦ ᑐᑭᓯᑎᑦᑎᒍᑕᐅᓛᖅᑐᑦ ᖃᓄᖅ ᐊᓐᓇᐅᒪᔪᖃᓲᖑᒻᒪᖔᖅ ᓅᓯᒪᓗᓂ ᓄᓇᒥ ᓯᑯᒥᓗ, ᐃᓕᓐᓂᐊᑎᑦᑎᓛᖅᑐᑎᒃ ᓄᓇᓖᑦ ᑕᒫᓂ ᐊᖑᓇᓱᑦᑏᑦ ᐃᓄᑐᖃᐃᓪᓗ.

ᓯᕗᓪᓕᕐᒥ, ᓈᑦᑎᐅᖑᔭᕐᕕᒻᒥ ᓄᕕᐱᕆ 12ᒥ 1ᒥ-4ᒧᑦ, ᓯᓚᒥ ᐃᓕᓐᓂᐊᑎᑦᑎᓛᖅᑐᑦ ᐃᒡᓗᓕᓂᕐᒥᒃ ᐊᒻᒪᓗ ᐃᑯᒻᒪᐃᓂᕐᒥᒃ ᐃᓕᓐᓂᐊᑎᑦᑎᓛᖅᑐᖅ ᓵᓚᒪᓐ ᐊᕙ ᐊᒻᒪᓗ ᓴᐃᒪᓐ ᓇᑖᖅ. ᓯᕗᓂᐊᒍᑦ ᐊᑎᓕᐅᕐᓯᒪᒋᐊᖃᓛᖅᑐᑦ ᑕᒪᑐᒧᖓ ᐱᖃᑕᐅᒍᒪᔪᑦ. ᐃᓕᓐᓂᐊᑎᑦᑎᓂᐅᓛᖅᑐᖅ ᐋᖅᑭᓯᒪᓛᖅᑐᑦ 15ᓂᒃ ᐃᓐᓇᕐᓂᑦ ᐃᓕᓐᓂᐊᑎᑦᑎᓗᑎᒃ. ᑭᒃᑯᑐᐃᓐᓇᐃᑦ ᐊᑎᓕᐅᖃᑦᑕᕈᓐᓇᖅᑐᑦ ᖃᕋᓴᐅᔭᒃᑯᑦ ᐃᕐᖐᓈᖅᑕᐅᑎᒃᑯᑦ ᑎᑎᕋᕐᓗᑎᒃ ᐅᕗᖓ [email protected] ᑎᑎᕋᕐᓗᑎᓪᓘᓐᓃᑦ ᐅᖄᓚᐅᑎᕋᓛᕐᒧᑦ ᐅᕗᖓ 222-0442.

ᐊᐃᑉᐹᓂ,  ᓯᕙᑖᕐᕕᒻᒥ ᓄᕕᐱᕆ 18ᒥ 10ᒥ-4ᒧᑦ ᐅᓐᓄᒃᑯᑦ ᐋᖓᓕᒃᑲᒃᑯᑦ ᑐᔅᓯᐊᕐᕕᖓᑕ ᑲᑎᒪᕕᐊᓂ, ᐃᓪᓘᑉ ᐃᓗᐊᓂ ᐊᓐᓇᐅᒪᓂᐅᑉ ᒥᔅᓵᓄᑦ ᐃᓕᓐᓂᐊᑎᑦᑎᓛᖅᑐᑦ ᑲᒪᒋᔭᖃᓗᐊᓛᖅᑐᑦ ᓇᐅᒃᑯᑦ ᐃᖏᕐᕋᔭᕆᐊᖃᓲᖑᒻᒪᖔᑕ ᐊᒻᒪᓗ ᓯᓚᒥᒃ ᑐᑭᓯᐅᒪᓂᕐᒥᒃ ᐃᓕᓐᓂᐊᑎᑦᑎᓛᖅᑐᖅ ᓵᓚᒪᓐ ᐊᕙ, ᓴᐃᒪᓐ ᓇᑖᖅ ᐊᒻᒪᓗ ᔩᑕᓘ ᑲᒃᑭᒃ. ᑖᓐᓇ ᐃᓕᓐᓂᐊᕈᑕᐅᓪᓚᕆᓛᕐᖓᑦ ᐃᓄᒃᑎᑐᑦ ᐃᓕᓐᓂᐊᑎᑦᓗᑎᒃ ᖃᓪᓗᓈᑎᑐᑦ ᑐᓵᔨᖃᕐᓗᑎᒃ. ᐊᑎᓕᐅᕆᐊᑐᙱᑦᑐᖅ ᑖᔅᓱᒧᖓ ᐃᓕᓐᓂᐊᕈᑕᐅᓛᖅᑐᒧᑦ, ᐃᓄᓕᒫᑦ ᑐᙵᓱᑦᑐᑦ.

ᑕᒪᒃᑮᒃ ᐃᓕᓐᓂᐊᑎᑦᑎᒍᑕᐅᓛᖅᑑᒃ ᐊᑭᖃᔾᔮᓛᙱᑦᑑᒃ ᐱᔾᔪᑎᒋᓪᓗᒍ ᑖᒃᑯᐊ ᐃᓚᒋᔭᐅᓛᕐᖓᑎᒃ ᑲᓇᑕ150 ᖁᕕᐊᓲᑕᐅᓂᖓᓂᒃ, ᑮᓇᐅᔭᖃᖅᑎᑕᐅᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᔅᓴᖅ 222-0442, ᖃᕋᓴᐅᔭᒃᑯᑦ ᐃᕐᖐᓈᖅᑕᐅᑖ [email protected], ᐅᖃᓕᒫᕋᔅᓴᐃᑦ ᐅᕙᓂ www.canada150iqaluit.com, ᑕᑯᓂᐊᕐᓗᒋᓪᓘᓐᓃᑦ ᐃᑭᐊᖅᑭᕕᒃᑯᑦ ᑐᓴᐅᒪᖃᑦᑕᐅᑎᕕᑦᑎᒍᑦ ᐱᖃᑎᒌᓄᑦ ᑐᓴᐅᒪᖃᑦᑕᐅᑎᕕᒻᒥ Facebook, ᐅᖃᓗᕋᐅᔭᐅᑎᒃᑯᑦ Twitter, ᐊᒻᒪᓗ ᐊᔾᔨᙳᐊᓂᑦ ᑕᑯᖅᑯᔾᔨᕕᒃᑯᑦ Instagram.